dalugdog

makusog an hurudinghuding sa panganoron
sugad sin mayon na naman masulod
na makusog na hangin, magub-at na uran.

(diri kaya matuga na an bulkan?)

hale sa hiwas san dagat Pasipiko,
nag tagdiyo-diyo an pagbatog
sa pinit san parola ni San Bernardino.

naamot sa pira kabeses na pagkulog san imo boot

sa diri niya pag-uli sin atab
sa diri niya pagpa-isi na diri na makadiretso sa balay
sa diri niya paghatag sin mayad na pag-ako
sa mga hinimo mo para siya mapa-ogma.

dunaghan sa pag-awat san panahon
hanggan sa lunampas sa imo sulodan.

uyon na. makaskason na an dalagan san busabos
diretso sa mapioton na bongto san dubdob mo
para iluwas na an paso, an pagkaladkad san ulo.

marasa pa an maabutan san hangit mo.

hapot

diin ka na makadto pakatapos ta?
hapot san nakapirong ko na mata.

kopo ako san mapinit na hangin san Dancalan;
siya nag-iimod sin tv kaabay an asawa.

diri ko na nahulat an simbag pagmuklat ko
nahulos na san balod an too ko na siki

an panganoron dini sa baybayon madulom
sugad sin may maagi na naman na bagyo

tunindog ako, pinagpag an baybay sa lawas
akay baya an kamondoon kangalas-ngalas?

sa kadaghan san tawo na mamumut-an
siya pa an pinili na wara pakadtuan

may mga namagtirinawa na soltero sa cottage
may namagbaralatas na tricycle sa tinampo

sa harayo, an bulkan nagngungurutob

namumundo man ada sini na sitwasyon

basi pa sunimbag na siya sa cellphone ko,
ma tagdiyo-diyo na ako pauli sa bongto.