Isang sulyap
Isang ngiti
Katotohanang kayhirap salain
sa paulit-ulit na pagtatangka
Sa marami-rami na ring paglusong
Sa kadalasang pagkalunod
Pagkapaso
Pagsabog ng puso
Bakit naalala ka?
Sa tuwinang tahimik ang hangin
Banayad ang sikat ng araw
At walang banta ang ulan sa lupa
Ikaw ang hamog sa lamig at dilim ng gabi
Ang panaginip sa init at panatag ng umaga
Ang awit sa antok at pahinga sa hapon
Bakit di kita maiwasan?
Sa muli nating pagkikita
Itatanong ko na sa iyo
Ano ang pagkakaiba kung ikaw ay walang asawa
At ako ay isang sirena?
