Two New Poems

MisYu has read my previous poems and asked me again to change them. He still doesn't get the tone that he wants from those that I've written earlier. So I have sent him again my latest take on Angela's Love and Angela's Realization. Here they are. What do you think?


Ikaw Lang (Angela's Love)

Ikaw ang aking buong mundo,

Ang pag-ibig na matagal kong pinangarap

Sa mga gabing ang lamig ng kubrekama

Ang akin lang kapiling,

Sa mga tanghaling ang tangi kong kasalo

ay ang banaag ng telebisyon o ang tili ng radyo.

Ikaw lang ang aking mahal

Ang tangi kong buhay

Ang aking pangarap.

Ikaw ang bukang-liwayway

na matagal kong hinintay.

Ang lahat ng kasagutan sa aking pagbabakasakaling

Darating ang katapusan ng aking pagtitiis.

Sa mga hapon na ang tanging kaulayaw

ay ang angas ng mga naghahabulang sasakyan.

Ikaw lang ang aking ibig

Ang aking tanging bituin

Ang nag-iisang langit.

Ikaw ang tanging paraisong minimithi

Ng pusong pudpod na sa hungkag na pagsuyo.

Ang kabuuan ng pirapirasong ngiti

Sa mga umagang tanging kasama

Ay ang libu-libong pagbabalewala

at walang katuturang pagtawa.

Ikaw lang ang aking ngiti

Ang aking tanging liwanag

Ang aking kabuuan.

Ikaw lang na ang tanging hangad ay ang lahat ng akin.

Ikaw lang na ang aking puso, ang natatanging hiling.

Nagbabagang Luha (Version Four, Angela's Realization)

Hinangad ko ang iyong pag-ibig

Sa pag-aakalang ika’y karapatdapat.

Itinakwil ko ang lahat

Dahil sa pangako mong susuklian ang aking alay

Ng iyong tapat

At walang katapusang pagmamahal.

Hiniling kita sa langit

Sa pag-asang ikaw ang kasama sa kailanman.

Ibinigay ang lahat sa iyo

Pero ito pa sa akin ang iyong iginanti,

Ang pagdurog sa puso,

Ang pagguho ng aking mundo.

Naglaho ang lahat sa aking akala

Ngayong nagising, na ika'y wala na

Dibdib ko'y nawarak, luha'y nagbabaga

Mundo ko'y huminto, wala na ang saya

Puso ko’y tuliro sa hinanakit

Nilinlang mong labis ang aking dibdib

Ako’y naging baliw

Sa naupos mong mga pangako.

Tila ibong wala ng pakpak,

Isang bulaklak na nawalan ng halakhak.

Biglang natunaw ang hubad kong pangarap

Sa kasinungalingan at iyong pagpapanggap

Puso'y nag-aapoy, bakit nagdurusa

Nagbabagang luha, upos na'ng ligaya

Sa kabila ng lahat nitong luha at pait

Ako ay babangong may poot sa dibdib

Dugo mo'y dadanak, puso’y igaganti

Papatayin kita, ako’y magwawagi.

Sa kabila ng sakit na namuo sa dibdib

Ako ay gaganti, pupulbusin kita

Isa ka nang bangkay pagkatapos ko sa’yo

Saan ka man magtago, pupugutan kita ng ulo.